الانتقال الى مكتبة الفيديو

 
آخ لو أصير ملك!

ادارة السلطة او قيادة الحكومة تحتاج إلى قدرات وامكانات كبيرة لا تتوفر لمن هب ودب، بل يجب ان توكل هذه المهام إلى من يحمل مواصفات خاصة، تتمثل في القدرة على التعامل مع الموقف، ومدى الخلفية الفكرية والروح القيادية التي تتفاوت بين شخص وآخر، وتكاد تنعدم لدى آخرين.

وكل منا يتوسم في نفسه القدرة على القيادة وادارة الامور بما يفضي الى بر الامان. لذلك ترى الكثيرين يقولون "آخ لو بيدي چا امشيهه عدل"، ولو وضع في مركز قيادي لوجدناه لا يختلف عن الآخرين في الفشل أن لم يكن أكثر فشلا من سابقيه. لذلك كثيرا ما يخدع الناس بهذه الجهة او تلك او بشخص دون آخر، وعند الامتحان نجده كسابقيه، وهذه الكارثة دفعت بالكثيرين إلى الواجهة فكانوا سببا للخراب والدمار.

لذا صار لزاما أن يكون الاختيار على اساس المعرفة بماضي تلك الجهة وما قدمت في الماضي وما فعلت في الحاضر وما تسعى إلى تحقيقه، على أن يحتكم الانسان لعقله في الاختيار دون الاعتماد على العاطفة التي اوصلتنا الى ما نحن عليه من تشظ واحتراب.

ضحك سوادي الناطور وقال: "يگولون اكو فد واحد يمشي بالشوارع ويصيح.. آخ لو أصير ملك يوم واحد ..وصل الخبر للملك گال جيبوه. وقبل لا يجيبوه أمر حاشيته يعلگون صخرة چبيرة فوگ الكرسي ويربطوها بحبال بحيث اللي يگعد جواها يتصور راح توگع عليه .جابوا الأفندي للملك، فگام الملك من الكرسي وگاله اگعد بمچاني ونزع التاج وخلاه فوگ راسه وگاله انت ملك منا لباچر هيچ وكت، وارد اشوفك شتسوي. هذا گعد بين مصدگ وبين مچذب ، وظل يباوع على الحاشية وحيطان القصر، وچان يشيل راسه ويشوف الصخرة اللي معلگه فوگه. إجو الوزراء يباركوله وهو شايل راسه ويباوع عالصخرة، وإجو ناس عدهم مشاكل وهو بس يباوع عالصخرة ويخاف توگع فوگ راسه وتموته، وخلص اليوم وإجه الملك الأصلي، گاله بشرني شسويت؟ گاله والله ياجلالة الملك شسويت.. إذا انتوا حاطين صخرة فوگ راسي كل شويه اگول راح تموتني. گاله الملك انت مو ملك؟ لو ملك چان صحت چم واحد من الحاشية يشيلون الصخرة من فوگ راسك؟ اذا انت صخرة فوگ راسك ماعرفت تشيلهه، تريد تحكم مملكة وشعب!؟ والعاقل يفتهم!".

  كتب بتأريخ :  الإثنين 30-10-2017     عدد القراء :  2634       عدد التعليقات : 0