بعد شالحك جزه النيسان

والمالحك ما يلحك

ولا بيدي رسن دنياي

والوي عنانهه وتسحك

يقنديل الليالي السود

نمنه وبعدك امعلك

يدرويش القوافي الجام

من جان الوكت زيبك

الك بي هوه العزاب

لا غرب ولا شرك

المه وروحي ثوب عروس

ما كتلي هوه العزاب للمفرك

شمعه اشتاخذ من الليل

خلصت وابو طبيله اتعطل وما دك

وانا يا حوي مو ايوب

والتحت الثكال شما صبر يزهك

اخذلك جلمه اغلى الشمعه تكضي بساع

مو بس الهدوم الناس هم تعتك

خليهه انعم الله رطوبة السباح

لا ريعان ظل ولا نباع ازرك

بعد شالحك

زمانك مو زمان الجان

ما هو الواعد زصدك

اظملك حفنه مني وضوك

واصفن بي من تشهك

ذاك انه يبعدك ذاك

بس فرق الجروح اغمك

وادور بطارف الدولاب

مدري اشظامه التطلك

بعد شالحك

وكت ما عاف ذاك الحيل

هسه ايعوفني امعوك

لو يعرك وجه دنياي

للعنده وجه يعرك

تنخل واليطيح ايطيح

وشراع الورق ينشك

دنيه الصاح منهه الحيد

مو ندمه الرجيج ايصيح من ينطك

بعد شالحك

يليل البارحه اندليتني بياصوب

لو ما ظال لون البابنه المغلك

لاكيني عصاري بسوكنه المسكوف

وبريحة عبي الحلوات خل نغرك

وي زف الفخاتي على الشواطي غروب

ومواعد عشك وعيون تتعانك

وخل برد القوافي اينزز النيشان

واحمل غيضته ويكفيك ما دنك