من تلفظ فؤاد تصير يعراق لان ماكو فرق مابين الاثنين...
نفس الهموم ونفس الاخلاق ونفس طبع السماحة وخزرة العين
رفاكة محبة بدرب عشاق وبثنينهم طعم الوفه وملوحة الطين
لكن :
فؤاد، وكبل ساعات الفراق وكبل لاينكطع صوت التلاحين
شلع وفه فؤاد ديون العراق وظل العراق بركبته الدين
¬¬¬----------------------
سلامي علغريب المات بالشام علبلبل ترك خلفه الغناوي ايتام
سلام على صوته العشكته الناس عراقي اللحن بصراوي الاحلام
سلامي عل طور الكال مابيع حضن جوعه وما شرى ولاسام
مايوم اشتكى وهمومه غربال ولا نايه انحنه ولا دنك الهام
غناويه تفك للعشك حراس وبشوجر محبته اتحزم احزام
ماخان عشكه و لاكفر بيه ولابدل هويته بطول الايام
علم رافع علم ماطاح للكاع حلم يحرس حلم وبعين متنام
اذا كلتوا فؤاد اتطشر الشوك ويفوح العطر من بين الانغام
واذا كلتوا فؤاد انرعب موتور لان اسمه حرز عن كل الاوهام
عبالك فشك لودندن ابعود من صوته الحنين انرعب صدام
-------------------
سلامي علبلبل عرف شيريد وطن حروشعب للدوم مرتاح
نذر عمره ذبيحة لجية العيد حسب جيّتة اتجيبنه الافراح
واجانه العيد لكن باكته الحوت وظل بس الحزن بالديرة سوّاح
وصار الهزار بقفص محبوس وظل عشك العمر بحلوك تمساح
وظل المغني صوته مبحوح وما ينسمع بس صوت الانباح
طنطل كبل رد النه وبزود وموبس مسه يصابحنه مصباح
طنطل كبل يتسله بمزاح وطنطل هلوكت يرعبنه بسلاح
القاتل كبل معروف الاوصاف وهذا الوكت كتالته اشباح
صك وعلس والديره فرهود الحارس يصك والحامي ذباح
سلامي يافؤاد ونام مرتاح عهد لازم ظلام الليل ينزاح
عهد عن كبرك انزبّر الشوج وعد راسك ، عهد ، ينزرع قداح
وترد العصاري وفرحة العشار والبيدر يغني ويركص الفلاح
سلامي يافؤاد ونام مرتاح عهد لازم ظلام الليل ينزاح
عهد
